An Phoibleog Liath
Populus x canescens
Is crann mór, ard, duillsilteach í an phoibleog liath. Is hibrid í idir an phoibleog gheal (Populus alba) agus an crann creathach (Populus tremula). Breathnaíonn sí níos cosúla leis an gcrann creathach ná an phoibleog gheal. Cosúil leis an bpoibleog gheal, bíonn codanna den chrann, go háirithe na duilleoga agus na géaga, clúdaithe le ribí gruaige. Fásann sí go sciobtha agus go hard agus cuireann sí crainn nua aníos óna cuid fréamhacha. Mar gheall ar an tréith seo, feictear clampaí móra den chrann ag fás le chéile.
Béarla: Grey Poplar
Réamhrá
Is hibrid í an phoibleog liath idir an phoibleog gheal (Populus alba) agus an crann creathach (Populus tremula). Fásann sí go tréan agus go hard (go 42 m[1]) agus déanann sí crann galánta. Mar is minic a tharlaíonn le hibridí, is iondúil go bhfásann sé níos airde ná ceachtar tuismitheoir. Amhail poibleoga eile, cuireann an phoibleog liath meatháin aníos go tréan, agus is minic a fhásann an crann i gclampaí móra. [2] Tá sí curtha, den chuid is mó, in oirthear agus i ndeisceart na tíre.
Cur Síos ar an bPoibleog Liath
Éiríonn coirt an chrainn claiseach le haois. Bíonn ribí gruaige liath ar na bachlóga.[3] Bíonn barr na ngéaga óga clúdaithe le feilt chlúmhach liath nó bán freisin, agus bíonn an rud céanna amhlaidh le taobh íochtair na nduilleog mullaigh. Ní gá go mbeadh sé seo amhlaidh leis na géaga eile ná leis na duilleoga eile.[4]
Is cruth ciorclach a bhíonn ar na duilleoga agus is minic a mbíonn duilleoga móra ar na géaga óga, láidre. Bíonn imill na nduilleog fiaclach, le fiacla móra, maolaithe. Is dath glas dorcha lonrach a bhíonn ar thaobh uachtarach na nduilleog. Bíonn an taobh íochtarach níos gile.
Cosúil leis na poibleoga go léir, tá an phoibleog liath dé-éiciach agus bíonn caitíní baineanna ar na crainn bhaineanna agus caitíní fireanna ar na crainn fireanna. Níl mórán crainn bhaineanna den hibrid seo ag fás.[4]
An Phoibleog Liath agus an Phoibleog Gheal
Bíonn sé deacair uaireanta idirdhealú a dhéanamh idir an phoibleog liath agus an phoibleog gheal. Bíonn dath níos gile ar thaobh íochtarach na duilleoige ar an bpoibleog gheal. Is iondúil go mbíonn gas na duilleoige níos faide ar an bpoibleog liath.
Ní bhíonn na duilleoga chomh maothánach le duilleoga a bhíonn ar mheatháin óga na poibleoige gile, agus bíonn na caitíní níos faide ar an bpoibleog gheal freisin.[4]
Cailleann duilleoga na poibleoige léithe a gcuid ribí gruaige (éiríonn sad amhulchach) faoin am a thagann an fómhar.
Tagairtí
1. Stace, C., New Flora of the British Isles. 4ú ed. 2019: C&M Floristics.
2. Stroh, P.A., et al., Plant atlas 2020: mapping changes in the distribution of the British and Irish flora. 2023: Princeton University Press.
3. Webb, P.A., J. Parnell, and D. Doogue, An Irish Flora. 1996, Dún Dealgan: Dundalgan Press (W.Tempest) Ltd.
4. Bean, W.J. ‘Populus × canescens’ ón suíomh idirlín Trees and Shrubs Online. Le fáil: https://www.treesandshrubsonline.org/articles/populus/populus-canescens/.
Tuilleadh Íomhánna
